Выстояли-Победили

30 кастрычніка група 260120 наведала ўнікальную выставу «Тайны канцылярыі» пад кіраўніцтвам дацэнта кафедры гісторыі Беларусі і славянскіх народаў Аляксандра Федаравіча Рацько, якая ладзіцца ў музеі кнігі Нацыянальнай бібліятэкі Рэспублікі Беларусь. Экспазіцыя падрыхтавана ў рамках аўтарскага праекта «У пошуках страчанага» і дазваляе праз прадметы калекцыі Уладзіміра Ліхадзедава адкрыць цэлы мацярык, забыты пласт матэрыяльнай культуры. Выстава прысвечана гісторыі беларускага пісьменства, але не ў стандартным выглядзе, праз кнігі, а праз інструменты, з дапамогай якіх кнігі ствараліся.

Студэнты пазнаёміліся з гісторыяй прыладаў ад «пісалаў» XV стагоддзя да звыклай шарыкавай ручкі, даведаліся, што пісалі нашы продкі ў XV-XX стст., убачылі першыя алоўкі і ручкі, чарніліцы і г.д., пісьмовыя прыналежнасці знакамітых людзей. З’явілася нават магчымасць уявіць сабе, якой магла быць ручка Скарыны!

Увазе студэнтаў былі прадстаўлены асабістыя прадметы вядомых асоб, якія звязаны з гісторыяй іх сем'яў – князёў Радзівілаў, родных кампазітара Станіслава Манюшкі, фінансіста Якава Палякова, краязнаўца і гісторыка Оттана Гедэмана, нямецкага фатографа Фрыца Краўскопфа, маршала Сямёна Цімашэнкі і інш.

Наведванне выставы было цікавым і карысным для студэнтаў–першакурснікаў. Яно ўзбагаціла іх веды аб тым, як тэхналогія пісьма з’явілася і паўплывала на цывілізацыйнае развіццё нас асабіста і на ўсё чалавецтва.